AUGNÞURRKUR

Júlíus Valsson gigtarlæknir:

Augnþurrkur, hvað er til ráða?

Augnþurrkur stafar af minnkaðri táraframleiðslu. Einkenni augnþurrks eru sviði og ertingur í augum og líkt og einhver aðskotahlutur, t.d. sandkorn sé í auganu. Augun eru oft rauð og þrútin.

Orsakir geta verið ýmsir sjúkdómar svo sem Sjögrens sjúkdómur en einnig getur augnþurrkur komið vegna aukaverkana lyfja, sem hafa andkólinerga verkun svo sem ýmis þunglyndislyf (oft nefnd geðdeyfðarlyf).
Táraframleiðslan minnkar einnig smám saman með aldrinum.

Ef þú ert með mikinn þurrk í augum prófaðu þessi einföldu ráð:

Notaðu gerfitár. Gerfitár líkjast eðlilegum táravökva og innihalda efni, sem halda augunum rökum. Æskilegt er að nota ávallt gerfitár, sem ekki innihalda rotvarnarefni. Notaðu þessi gerfitár eftir þörfum og sparaðu þau ekki.

Takmarkaðu eftir megni notkunina á öðrum augndropum. Sumir augndropar innihalda æðaherpandi efni sem dregur tímabundið úr augnóþægindum svo sem sviða og roða en getur með tímanum aukið augnþurrkinn en einnig aukið á sviða og roða í augunum ef þessi lyf eru notuð lengur en þrjá daga í senn.

Reyndu að halda rakastiginu á heimili og vinnustað á milli 30 - 50%

Forðastu heitan blástur í augun t.d. frá hárþurrku eða frá öðrum tækjum

Notaðu hlífðargleraugu - Notaðu t.d. alltaf sundgleraugu í sundlaugum og gleraugu með hliðarhlífum í miklu roki

Hikaðu ekki við að leita til augnlæknis ef þessi einföldu ráð draga ekki úr augnþurrknum

 

Munið tölvupóstinn: gigt@go.to